ዶ/ር አምባቸው መኮንን

ም/ርዕሰ መስተዳድር ደረጃ የኢንዱስትሪና ከተማ ልማት ቢሮ ኃላፊ መልዕክት

አገራችን ኢትዮጵያ ላለፉት 11 ተከታታይ ዓመታት ባለሁለት አኅዝ የኢኮኖሚ ዕድገት እያስመዘገበች መምጣቷ የተቀየሰው የህዳሴ መስመር ለመሳካቱና የህዝቦች ተጠቃሚነት ለመረጋገጡ ጉልህ ማሳያ ተደርጐ ይወሰዳል፡፡ በአገራችን እየተመዘገበ ላለው እድገት ዋነኛው መሠረት የግብርናው ዘርፍ መሆኑ አጠያያቂ ባይሆንም የእድገቱ ቀጣይነት ለኢንዱስትሪ ልማት መሥፋፋት እያበረከተ ያለው አስተዋፅኦ ከፍተኛ ነው፡፡

በአንድ አገር ኢኮኖሚያዊ እድገት፣ የቴክኖሎጂ ምጥቀትና ተወዳዳሪነት ብሎም የህዝቦች ብልፅግና እንዲረጋገጥ የኢንድስተሪ ልማት መስፋፋት መተኪያ የሌለው እንደሆነ የበለፀጉት አገራት ታሪክ ያስተምራናል፡፡ በመሆኑም አገራችን መካከለኛ ገቢ ካላቸው አገራት ተርታ ለማሰለፍ፣ የህዳሴ መሥመራችንን ስኬታማነትና የህዝቦችን ተጠቃሚነት ለማረጋገጥ አሁን ያለው ግብርና መር ኢኮኖሚ እድገቱ ቀጣይነት እንዲኖረው  በኢንዱስተሪ መር ኢኮናሚ መተካት ይኖርበታል፡፡ ይህ ሲባል የግብርና ክፍለ ኢኮኖሚ አያድግም ለማለት ሳይሆን ኢንዱስትሪ በኢኮኖሚዉ ላይ የአንበሳውን ድርሻ መወስድ አለበት ማለት ነው፡፡

ኢንዱስትሪንለማስፋፋትና የአገሪቱን እድገት ቀጣይነት ለማረጋገጥ የአገር ውስጥ ባለሀብቱ ድርሻ የማይተካ ሲሆን ክልላችን በማኑፋክቸሪንግ ኢንዱስትሪው ለሚሠማሩ ባለሀብቶች የተለየ ድጋፍ በማድረግ ላይ ነው፡፡ አምራች ኢንዱስትሪው ፈጥኖ ወደ ሥራ ሲገባ ምርታማነት እንደሚጨምር ስለሚታመን ቀድሞ የለማና ከማንኛውም የይገባኛል ጥያቄ ነፃ የሆነ መሬት ማዘጋጀት አስፈላጊ በመሆኑ በክልላችን 11 ከተሞች የኢንዱስተሪ መንደር በመከለል ለባሀብቱ መሠረተ ልማት የተሟላለት መሬት እየቀረበ ነው፡፡በመሆኑምየበሰለ አስተሳሰባችሁንና የማምረት ፍላጐታችሁን ይዛችሁ ወደ ክልላችን ብትመጡ  ምርታማ ሊያደርጋችሁ የሚችል አገልግሎት የምታገኙ መሆኑን ላረጋግጥላችሁ እወዳለሁ ፡፡ የአገራችን እድገት የሚረጋገጠዉ በመላዉ ህዝቦቿ የነቃ ተሳትፎ በመሆኑ የአገራችን ልማታዊ ባለሀብቶች በአማራ ክልል ኢንቨስት እንድታደርጉ ጥሪየን አቀርባለሁ፡፡

                         ጊዜው ሠርቶ ለማደግ ምቹ ነው፡፡

                              አገራችንን በጋራ እናልማ !!